Takot o Kaba?

Sadyang napakaraming kababalaghan
Naglipana sa mundong ating ginagalawan
Mga eksperto'y hindi kayang ipaliwanag
Kakaibang mga nilalang na ating nababanaag!

Gumagawa ng iba't ibang tunog
May parang mga batong inuuntog
May parang mga bakal na nagkakalansingan
May parang mga taong nahihirapan!

Ngunit sa aking mga naranasan
Iisa pa din ang hindi matakasan
Kakaibang kaba aking nadarama
Ang mga tuhod ko'y nanginginig pa!

Ito ay sa tuwing masisilayan
Ang mukha mong kagandahan
Ang mga mata mong nagkikislapan
Ang ngiti mong sa pakiramdam ay nakagagaan!